PUERTO RICO, 2010

(Música de Mamá Cabra: "Un peixe moi divertido")

Un ano máis abrimos esta ventá ó mundo, desta volta é para compartir con vós o noso Diario de Viaxe a Puerto Rico.

Sodes moitas as persoas que nos "acompañastes" ó longo destes dezasete días. A todas e cada unha de vós, quero agradecer a agradable compañía, tanto ás que me animastes a escribir cos vosos comentarios sempre tan agarimosos (no blog, en facebook, mediante correos electrónicos, teléfono ou persoalmente) como ás que viñestes con nós desde o voso silencio pero que vos sabemos aí e gústanos que así sexa ;-)
Tamén un aloumiño especial a tódalas persoas que chegades a este blog cando a viaxe xa rematou... A unhas e outras desexo que pasarades, ou pasedes, uns momentos entretidos contemplando fotos e/ou lendo as miñas humildes anotacións...

Graciñas por virdes con nós e ata sempre!!!

Sabela.

SÁBADO, 8

Erguémonos hoxe para preparar as mochilas, cargar os coches de tío Moncho e tía Enid e saír cara a San Juan para pasear novamente gozando da beleza do Vello San Juan -que é realmente impresionante- xantar alí e finalmente achegarnos ó aeroporto.

Pasamos un pedazo moi agradable dando millo ás pombas…

En San Juan recollemos a Monchito e despois de comer fomos xuntos ó aeroporto. Alí despedímonos todos pois el voaba ás 17:30h. para Miami e nós ás 18:30h. con destino Madrid. Entretivémonos xogando no aeroporto ata a hora de embarcar e seguimos enredando longas horas no avión.

Así fomos levando con paciencia, e coas pilas recargadas ata os topes de enerxía caribeña, esta longa viaxe de retorno. Embarcamos o sábado ás 18:00h. no aeroporto de San Juan e baixámonos do noso coche en Muimenta ás 18:00h. do domingo: dezanove horas de viaxe máis cinco de diferenza horaria que suman un cansancio considerable pero moi doado de soportar grazas á cantidade de bos momentos que vivimos alá e grazas tamén a tódalas persoas que día a día (ou de cando en vez) nos seguistes a través deste humilde espazo…

GRAZAS de corazón a todos e todas, nesta viaxe permitídeme que o agradecemento sexa especial para a miña amiga Enid e “os seus” ;)

VENRES, 7

Quedábanos por facer a visita á “Hacienda Buena Vista” así que alá fomos esta mañá despois de mercar uns libros de contos e álbumes ilustrados de Puerto Rico para a nosa “bibliotequiña” da casa…

Na “hacienda” asistimos a unha visita guiada e así puidemos escoitar as interesantes explicacións da guía que nos contou de que maneira, aló polo ano 1847 e co traballo de moitos escravos, facían todo o proceso de elaboración de fariña de millo nun principio e de café e cacao anos despois.

Vimos como tódolos mecanismos funcionan coa caída da auga polo seu propio peso, sen máquinas sofisticadas nin electricidade, e explicounos tamén os distintos pasos no proceso de cultivo e preparación dos grans de café e cacao. Resultounos moi curioso todo pois non tiñamos nin idea de onde saía o chocolate que tanto nos gusta... Seguimos as explicacións con atención e paseamos polo lugar desfrutando dun ambiente fresquiño que conseguen grazas ás múltiples especies vexetais e auga que alí hai.

De volta a casa démonos un chapuzón na piscina para refrescarnos e comer máis cómodos. Pola tarde paseamos de novo pola Praza de Ponce e despois fomos ó Club Deportivo para xogar un pouco a tenis e enredar por alí. A pesar de ter anoitecido xa, a temperatura é tan agradable que dá gusto estar fóra.

Como prestou o último baño nocturno na piscina!!! E que peniña nos dá pensar que xa rematan estes dezasete días de vacacións tan especiais...

Hoxe non dicimos “ata mañá” pois tardaremos uns días en voltar por aquí. Mañá temos previsto preparar de novo as nosas queridas "mochilinhas", pasar o día en San Juan e, á noitiña, coller o avión que nos levará –vía República Dominicana- ata Madrid. De todos modos, prometemos facer anotacións na “moleskine” para compartir con vós esta última etapa da viaxe unha vez acomodados na casiña…

Ata daquela, entón!!!

XOVES, 6

Que día de Reis tan distinto a tódolos que levamos vivido!!!

Pasámolo tan ben e estamos tan entretidos e ocupados con tal cantidade de sensacións novas e gratificantes que non somos conscientes de que esta pasada foi a Noite de Reis e de que hoxe, se estiveramos na casa, madrugariamos para ver que nos deixaron…

Para nós este ano é un día máis, outro día cheo de “regalos” que non están envoltos pero que igualmente nos enchen de ilusión…

De novo fixo un día de sol, comprobamos a temperatura exterior de 30ºC e metemos o termómetro na piscina para ver que pasaba un chisco de 22º. É incrible!!

Nesta mañá rematamos os pouquiños deberes que aínda nos quedaban, lavamos a roupa destes días e desfrutamos moito da piscina que tanto nos gusta.

Pola tarde fomos camiñar ó Paseo da Guancha que estaba abarrotado de xente, principalmente nenas e nenos que corrían arriba e abaixo nas súas bicicletas novas. Pasamos un pedazo moi agradable dando de comer sardiñas ós pelícanos e mais a uns grandes peixes que habitan no porto.

O sol púxose estando aínda alí, a carón do mar, e voltamos para a casa cando xa era de noite para preparar a cea e desfrutar doutra agradable velada ceando fóra, no entorno da piscina e cunha temperatura moi agradable, 20ºC.

E cun pouco de pena porque comezamos a verlle o final a estas dúas semanas tan especiais, deitámonos e descansamos para poder aproveitar ó máximo o pouquiño tempo que nos queda aquí (sniff).

Ata mañá!!

MÉRCORES, 5

Hoxe foi o último destes tres marabillosos días en Illa Culebra. Levantámonos para almorzar e aproveitar a última mañá de baños e buceo en Praia Flamenco; gustounos moito observar os pelícanos que de vez en cando se botan ó mar en picado para pescar algún que outro peixe…

De volta a casa duchámonos e recollemos todo para deixar o lugar como nós o atopamos o primeiro día.

Entón fomos camiñando ata a única zona na que se poden mercar bocatas, alí entretivémonos observando a natureza e xogando coas lagartixas.

Algo máis tarde chegamos ó porto e alí paseamos polas rúas desta pequena e única localidade da illa, chamáronnos a atención as múltiples cores con que estaban pintadas as casas ademais de murais que lle daban un toque bohemio ó lugar. Con algo de retraso, e cando o sol xa comezaba a poñerse, chegou o barco buscarnos e nel voltamos á “illa grande” nunha viaxe moi tranquila caracterizada pola calma do mar e ausencia de oleaxe; esta travesía non tivo parecido ningún coa de ida, hai quen di que é máis levadeira porque o barco vai costa abaixo ;)

Un pouco máis pesadas resultáronnos as dúas horas de coche desde Fajardo ata Ponce pero chegamos ben e, sobre todo, moi contentos coa experiencia de buceo nos arrecifes de coral da illa. Só nos quedaron forzas para cear e deitarnos con intención de recuperar totalmente para mañá.

Boas noites!!!