DOMINGO, 26

E como non queremos perdernos nin un minuto, ás 7:30 xa estabamos en pé dispostos a ducharnos, almorzar e poñermos os pantalóns curtos para ir pasar o día de excursión a carón do mar.

O almorzo supuxo un bo reconstituínte para comezar o día con forzas e non sen antes sorprendernos cando tía Enid dixo que debaixo da árbore había uns paquetiños aínda sen abrir e cos nosos nomes… A piques estivemos de comezar a crer en Santa Claus!!!

Axiña estivemos preparados para saír e aproveitamos o desprazamento para adentrarnos pola illa descubrindo currunchos como este no que paramos a mercar deliciosas piñas na beira da estrada.

Pouco despois chegamos a Boquerón, mercamos o correspondente tique para acceder á praia e alí nos instalamos entre palmeiras e cocoteiros alucinando coas grandes diferenzas entre Galicia e esta illa caribeña.

Por fin puidemos nadar neste mar de auga morna nunha praia case desértica nun día coma hoxe, rodeados de maxestuosas palmeiras e sorteando cos pés cunchas e corais.

Así de a gustiño e contentos tomámonos uns refrescos, cervexas e unhas bolsas de “yucas fritidas” de parecido sabor ás nosas “potatotas". Despois deste aperitivo achegámonos á localidade de Lajas para tomar na rúa uns fantásticos “ostiones” con limón moi similares ás ostras das rías galegas. Que bos estaban!

Desde alí fomos a un restaurante sobre o mar e de novo para a casa, agora polo camiño máis curto e rápido.

Xa na casa, os máis valentes bañáronse na piscina para sacar o sal do mar e xogaron un bo pedazo na auga.

Despois, vestidos e secos, xogamos polo xardín observando a natureza que nos rodea e o diferente que é da que estamos afeitos a ver. Para mostra, este verme chamado “carterpilar” deducimos que de aí debeu sacar o nome a gran empresa fabricante de maquinaria… tamén escoitamos un que outro “coquí”, esas ras pequeniñas e típicas desta illa que teñen un canto harmonioso e especial…

Descansamos un pouquiño e a continuación preparamos para cear fóra, comemos a carón da piscina e cunha temperatura moi agradable. Que rico!!!

Despois da cea a verdade é que xa necesitabamos deitarnos e fomos descansar moi satisfeitos polo día de hoxe e esperando novas aventuras para mañá. Boas noites!