QUENTANDO MOTORES...

Ola! Andades por aí? Xa vos botabamos en falta...

A verdade é que este ano nos fixemos esperar un pouquiño... De todos modos, esperamos non defraudarvos con esta nova aventura. Graciñas por virdes con nós un ano máis!

Pois veredes a razón da demora. Resulta que un chisco antes de comezar o verán, atendendo ás innumerables invitacións de Enid e Moncho que nos ofrecen a súa casa e a eles mesmos como guías para viaxar a Puerto Rico, tomamos a decisión de non desaproveitar tan tentador convite e irnos organizando para "cruzar o charco" neste 2010 que xa está a piques de rematar.

Moitísimas grazas de novo, amiga e cuñado!!!

Viaxar ó Caribe no verán pareceunos cando menos desaconsellable, por iso foi que intentamos organizarnos para dispoñer duns días en decembro-xaneiro e aproveitalos para, entre outras cousas, pasar un Nadal de sol e praia ;)

A verdade é que Carlos e mais eu será a segunda vez que viaxemos alá pois estivemos xa en Puerto Rico e Illas Virxes en decembro de 1991. Foi aquela unha viaxe un tanto "especial" pois embarcamos tan só catorce días despois de falecer meu pai e levamos con nós a miña nai e tamén a Rosi, unha das nenas coas que conviviamos por aquel entón e que tan só tiña oito aniños.

Buff, aínda gardo o "diario" que fixen con ela!

Penso que ningún dos catro esqueceremos nunca aquel marabilloso e diferente Nadal: cidades descoñecidas, praias virxes, buceo entre corais, festas caribeñas, porcos con volante...

Coa ilusión de que Iago, Ánxela, Paulo e Rosalía poidan gardar na súa memoria e corazón tantas e tan bonitas lembranzas como as que nós temos, comezamos cos preparativos nestes días, a tan só un mes de embarcar rumbo a América...

Unha vez máis merquei os billetes de avión por Internet (Madrid-Sto. Domingo-Puerto Rico- Sto. Domingo-Madrid), reservei hotel en Madrid para pasar a Noiteboa e ando a mirar un bungalow ou apartamento para pasar tres ou catro días en Isla Culebra que é unha reserva natural en pleno Caribe cuns fondos mariños impresionantes e que estamos desexando explorar... Merquei tamén unha cámara de fotos subacuática coa que espero poder ofrecervos, desde este espazo que sen dúbida nos manterá perto de vós, algún que outro coral ou peixe de cores... Onte mesmo pola noite tramitamos tamén a exención de visados para poder entrar en EEUU sen dificultades. E todo isto axúdanos a ir vendo que se aproxima a hora de partir...

Escribo esta entrada para darvos pé a que vos vaiades achegando quen queirades pero témome que non poderei pasarme por aquí coa frecuencia que quixera xa que, a diferenza doutras ocasións, estes preparativos cóllennos traballando e estudando a tope coa ilusión de rematar este primeiro trimestre con éxitos e así gozar dunhas boas vacacións antes de continuar co curso escolar. Si teño pensado levar, como xa vén sendo habitual, o portátil para manternos en contacto e irvos contando cousiñas ;)

Por certo, a "mochilinha especial" de tódolos anos xa está preparada así que podedes ir subindo a ela se o tedes a ben.

Ata pronto!!!